Якія кнігі “Мастацкай літаратуры” сталі лідарамі па колькасці прададзеных асобнікаў у першым квартале 2019 года ў сістэме гандлю “Белкніга”?
Можна сказаць, што нечаканасцей не адбылося. Як і летась, першае месца займае “Дзіцячы атлас Беларусі” (укладальнік Паліна Грынчанка). За тры месяцы яго набылі 188 пакупнікоў. Дарэчы, пачынаючы з лютага, гэта ўжо серыйнае выданне, што, мяркуючы па ўсім, чытачам прыйшлося даспадобы: за два месяцы яны набылі 88 асобнікаў “Дзіцячага атласа Беларусі. Легенды і паданні”.
Папулярнасцю карыстаецца і яшчэ адна наша дзіцячая серыя: “Жывая класіка дзецям”. У першым квартале было прададзена 55 асобнікаў зборніка Якуба Коласа “Сонцавы косы”, 44 – Уладзіміра Караткевіча “Жабкі і чарапаха”, 38 – Янкі Купалы “Дзівы і чары”, 35 – Максіма Танка “На вясёлкавым кані”.
Сярод лідараў таксама раман Святланы Алексіевіч “У вайны не жаночы твар”, сямнаццаты том Збору твораў Уладзіміра Караткевіча, зборнік аповесцей Паўла Місько “Прыгоды бульбобаў”.
У сістэме гандлю “Белкніга” ў краіне працуе больш за 100 крам.
