21 лютага Дзень роднай мовы выдавецтва адзначала разам з навучэнцамі гімназіі № 23 г. Мінска. Урокі роднай мовы праводзілі пісьменнікі. Лаўрэат Дзяржаўнай прэміі Беларусі Васіль Зуёнак пачытаў свае новыя творы пяцікласнікам, апавёў пра свае кнігі “Запішыце мяне ў мядзведзі” і “Азірнуўшыся, не скамянець”, якія апошнім часам пабачылі свет у “Мастацкай літаратуры”. Лаўрэат Дзяржаўнай прэміі Беларусі Уладзімір Ліпскі прэзентаваў сваю новую кнігу “Закаханы трэцякласнік”. Дзіцячая пісьменніца Наталля Бучынская пазнаёміла пяцікласнікаў з жыццём у казачным царстве, дзе пануюць вадзянікі (менавіта пра гэтых казачных істот яе кніга “Атракцыёны для вадзянікоў”). Прайшлі аўтограф-сесіі. Засталіся на памяць кнігі і фотаздымкі з пісьменнікамі.
