5 верасня падчас урачыстага адкрыцця Дня беларускага пісьменства ў Капылі была ўручана Нацыянальная літаратурная прэмія. Гэта свайго рода вынік вялікай, шматгадовай працы мноства беларускіх пісьменнікаў. Прэмія ўручалася ў шасці намінацыях: «лепшы твор (зборнік) паэзіі», «лепшы твор прозы», «лепшы твор публіцыстыкі», «лепшы твор для дзяцей і юнацтва», «лепшы твор літаратурнай крытыкі» і «дэбют». Нагадаем, што на прэмію прэтэндавала 59 пісьменнікаў.
Падчас віншавання лаўрэатаў Міністр інфармацыі Рэспублікі Беларусь Уладзімір Пярцоў адзначыў:
— Я ўпэўнены, што дзякуючы нашаму конкурсу, у Беларусі будуць нараджацца новыя пісьменнікі і новыя творы, якія дапамогуць пабудаваць моцную, квітнеючую і незалежную Беларусь.
Пераможцамі Нацыянальнай літаратурнай прэміі сталі:
Віктар Шніп у намінацыі «Лепшы твор (зборнік твораў) паэзіі за кнігу вершаў «Белае, чорнае і залатое»;
Віктар Праўдзін у намінацыі «Лепшы твор прозы» за кнігу «Парыж, Эйфелева вежа і...»;
Алесь Карлюкевіч у намінацыі «Лепшы твор літаратурнай крытыкі» за кнігу «Пухавіччына. Літаратурнае гняздо Беларусі»;
Аляксандр Радзькоў у намінацыі «Лепшы твор публіцыстыкі»;
Валянціна Паліканіна ў намінацыі «Лепшы твор для дзяцей і юнацтва» за кнігу «Усіх мацнее дабрыня»;
Кацярына Стройлава ў намінацыі «Дэбют» за кнігу «Насустрач Любві».
Старшыня Саюза пісьменнікаў Беларусі Мікалай Чаргінец адзначыў:
— Мяркую, што мы з упэўненасццю можам сказаць: селёта пісьменнікі святкуюць літаратурныя Дажынкі — падводзім вынікі сваёй працы. Беларуская кніга стала здабыткам свайго народа.
Арына КАРПОВІЧ
Р.S. Кнігі лаўрэатаў Нацыянальнай літаратурнай прэміі Віктара Шніпа, Аляксандра Радзькова і Валянціны Паліканінай выйшлі ў выдавецтве “Мастацкая літаратура”.
