21 лютага ў Дзень роднай мовы не было, напэўна, такой навучальнай установы на Беларусі, дзе не прайшлі б тэматычныя мерапрыемствы. Не застаўся ўбаку і факультэт міжнародных адносін БДУ. Тут прайшло чарговае мерапрыемства на дыскусійнай пляцоўцы, на гэты раз прысвечанае роднай мове.
У сустрэчы са студэнтамі і выкладчыкамі факультэта прынялі ўдзел намеснік дырэктара выдавецтва “Мастацкая літаратура”-галоўны рэдактар часопіса “Полымя” Віктар Шніп і пісьменніца Людміла Рублеўская. Прысутныя даведаліся пра выданні “Народнай бібліятэкі”, што выйшлі да юбілеяў Максіма Багдановіча, Янкі Купалы і Якуба Коласа, а таксама пра тыя кнігі, якія пабачылі свет у гэтым годзе ў шматлікіх серыях “Мастацкай літаратуры” і якія яшчэ рыхтуюцца да друку. Як галоўны рэдактар часопіса “Полымя”, Віктар Шніп распавёў прысутным пра стогадовую гісторыю часопіса і пазнаёміў з яго рубрыкамі і аўтарскім актывам. Удзельнікі сустрэчы ахвотна слухалі вершы сваіх гасцей, задавалі пытанні, у прыватнасці, абмеркавалі перспектывы народнай дыпламатыі, якая можа з дапамогай навукоўцаў і творчых дзеячоў папулярызаваць Беларусь і беларускую культуру ў свеце.
У гэты ж дзень намеснік дырэктара выдавецтва “Мастацкая літаратура”-галоўны рэдактар часопіса “Полымя” Віктар Шніп наведаў Мінскі дзяржаўны прафесійна-тэхнічны каледж гандлю, дзе прыняў удзел у святкаванні Дня роднай мовы. Студэнты з цікавасцю слухалі пра выдавецтва “Мастацкая літаратуры” і кнігі, якія там выдаюцца, а таксама пра часопісы “Полымя”, “Маладосць” і “Нёман”. Віктар Шніп пазнаёміў прысутных са сваёй творчасцю і адказаў на пытанні моладзі.
