У 2023 годзе часопіс “Маладосць” святкуе юбілей – 70-годдзе. І мы рыхтуем шмат цікавага: архіўныя знаходкі, неапублікаваныя творы, лісты ў рэдакцыю, інтэрв’ю з былымі супрацоўнікамі і членамі рэдкалегіі. Гэтыя і іншыя матэрыялы будуць публікавацца з працягам, пачынаючы з першага нумара. Яшчэ “Маладосць” аб’яўляе конкурс на лепшы празаічны твор для юнакоў і моладзі – без абмежаванняў па ўзросце для аўтараў, але па аб’ёме не большы за чатыры аўтарскія аркушы.
У першым паўгоддзі вас таксама чакаюць: паэзія Навума Гальпяровіча, Міхася Пазнякова, Віктара Яраца, Васіля Зуёнка, Казіміра Камейшы, Хведара Гурыновіча; проза Алены Брава, Яўгена Хвалея, Алеся Аляшкевіча, Валерыі Радунь, Ганны Навасельцавай. Новыя старыя рубрыкі: «Упершыню ў «Маладосці», «Каляндар музычных падзей», «Папытай у кнігарні», «Усмешкі «Маладосці». Новыя пераклады твораў вядомых і маладых замежных пісьменнікаў. Інтэрв’ю з вядомымі празаікамі Анатолем Казловым і Андрэем Федарэнкам, выбітным дырыжорам Паўлам Любамудравым і папулярнай тэлевядучай Таццянай Рудакоўскай. Круглы стол па актуальных пытаннях развіцця нацыянальнага кіно з удзелам рэжысёраў, кіназнаўцаў, супрацоўнікаў «Беларусьфільма» і аддзела кінематаграфіі Міністэрства культуры Рэспублікі Беларусь. “(Аб)Меркаванне” творчай спадчыны «бацькі» беларускай дзіцячай літаратуры Янкі Маўра вачыма сённяшняй моладзі з нагоды 140-годдзя з дня яго нараджэння.
