10 сакавіка ў Дзяржаўным музеі гісторыі беларускай літаратуры адбылося адкрыццё часовай літаратурна-мастацкай экспазіцыі “Фарбы душы”, прысвечанай 85-годдзю Дануты Бічэль-Загнетавай, 75-годдзю Раісы Баравіковай і 80-годдзю з дня нараджэння Веры Вярбы. Выстава зладжана сумесна з секцыяй Беларускага саюза мастакоў “Верасень” і прымеркавана да Дня жанчын.
На экспазіцыі прадстаўлены творы яркіх прадстаўніц беларускай плеяды жанчын-паэтэс, якія сваёй творчасцю аздобілі і ўзбагацілі беларускую літаратуру другой паловы ХХ стагоддзя. Сярод матэрыялаў выставы – кнігі юбілярак, большасць з якія ў свой час пабачылі свет у выдавецтве “Мастацкая літаратура”, пра якія ў сваім выступленні распавёў намеснік дырэктара выдавецтва-галоўны рэдактар часопіса “Полымя” Віктар Шніп.
