Сярод празаікаў майскага нумара – Ганна-Марыя Гараніна, Святлана Бязлепкіна і Людміла Рублеўская. Паэты нумара – Мацвей Лішын, Андрэй Кімбар, Казімір Камейша. Упершыню ў «Маладосці» свае творы прадставяць паэт Павел Любецкі і празаік Наталля Лабеева.

У гадавіну Вялікай Перамогі мы вырашылі згадаць тых, чыя маладосць прыйшлася на пякельныя 1941—1945. Тых, хто хацеў шчыра кахаць, будаваць сям’ю ды спакойна працаваць, але каму давялося рана пасталець, узяць у рукі зброю і пайсці ваяваць. Маладых, адважных і таленавітых, якія пакінулі след на зямлі. Пра іх матэрыял “Юнацтва наша – на заставах…”. Мы аб’ядналі творы беларускіх паэтаў, якія загінулі ў Вялікую Айчынную, з адказамі нашых аўтараў-пачаткоўцаў на пытанні: ці ведаюць яны гісторыі сваіх родных-франтавікоў і ці захоўваюцца ў іх сямейных архівах «ваенныя» рэліквіі? Такім чынам, перагукваючыся праз 80-годдзе, нашы абаронцы — аўтары і героі твораў — сустрэліся, каб даведацца, што мы пачулі праўду, расказаную імі, што сувязь часоў не перарвалася. 

Таксама раім звярнуць увагу на матэрыялы круглага стала “Жаночая літаратура: не толькі пра каханне, але і пра жанчын”. Для абмеркавання жаночай і фемінісцкай літаратуры мы сабралі беларускіх пісьменніц і паэтэс. Яны — з розных пакаленняў, пішуць у розных жанрах, выбіраюць розныя спосабы прасоўвання творчасці. Але кожная з іх прайшла пэўны шлях, шлях жанчыны ва ўсё яшчэ мужчынацэнтрычным літаратурным свеце. І іх галасы — важныя і значныя.