Пачаць новы год мы вырашылі з падвядзення вынікаў мінулага года. Па-першае, гэта агляд паэтычных старонак “Маладосці” за 2025-ы – з акцэнтам на асноўных тэндэнцыях і агульных праблемах, некаторых аўтарах і іх дасягненнях. Па-другое, вынікі конкурсу на лепшы фантастычны твор. Адзінадушным рашэннем журы было прадставіць пачаткоўцаў. 

Нашы лаўрэаты: Вольга Аляксеева, Алесь Дваракоў, Вікторыя Піліпенка і Андрэй Дарожкін. Іх творы — гэта сінтэз навуковай фантастыкі і казачнай, містыкі і фэнтэзі. Вікторыя Піліпенка ў сваім аповедзе «На ладан дыхаць» разважае пра існаванне душы пасля зямной смерці чалавека, і для сюжэтных пераходаў яна багата ўжывае беларускія фразеалагізмы. Апавяданне Алеся Дваракова «Ці тая я» — пра жанчыну са звышздольнасцямі, а «Вечнае жыццё» Вольгі Аляксеевай — пра ўяўнае каханне робатаў-людзей. «Русая ноч, сівы ранак» Андрэя Дарожкіна — сон наяве, які адбываецца на цэнтральных мінскіх лакацыях. Менавіта творы лаўрэатаў і склалі літаратурны блок студзеньскага нумара. 

Сярод паэтаў нумара – Андрэй Кімбар, Марына Неўгень і Настуся Шыпшына. А таксама ўдзельнікі літаратурнага аб'яднання «Актава», якое дзейнічае пры Барысаўскім цэнтры творчасці дзяцей і моладзі. Дарэчы, знаёміць нашых чытачоў з абласнымі і раённымі літстудыямі, гурткамі ды іх наведвальнікамі мы будзем увесь год.