У кастрычніцкім нумары часопіса «Маладосць» празаік Віктар Варанец распавядзе тры дэтэктыўныя гісторыі з жыцця прайдзісвета Анатоля Сідарэвіча — хлопца харызматычнага ды абаяльнага, здольнага на неверагодныя прыдумкі і бездакорную іх раэлізацыю. І ўсё дзеля таго, каб зарабіць грошай.

А празаік Андрэй Сідарэйка ў сваёй сацыяльна-сатырычнай аповесці «Крама-2» настолькі падрабязна вымаляваў тыпажы работнікаў і наведвальнікаў крамы, штодзённыя цяжкасці падчас яе працы, што кожны дакладна знойдзе там сябе, сваёго знаёмага альбо краму, якую часта наведвае. А вось апавяданне Ксеніі Зарэцкай «Мяне там чакаюць» перанясе нас у будучыню — час бяздушных робатаў, якіх канструктары змаглі пазбавіць усіх эмоцыі, акрамя пачуцця кахання…

Сярод паэтаў нумара — Міхал Бараноўскі, Васіль Зуёнак, Іван Капыловіч, Віктар Ярац. Упершыню ў «Маладосці» са сваімі вершамі выступяць Максім Крывіч і Дзіяна Трацяк.

З № 10 распачалася публікацыя тэкстаў з запісных кніжак Уладзіміра Караткевіча пад агульнай назвай «Адпрацаваць і адваяваць сваё». Чытач пазнаёміцца з запісамі розных гадоў, а таксама вершамі, якія не ўвайшлі ў першыя два тамы Збору твораў. Матэрыял падрыхтаваў Пятро Жаўняровіч.