У наступных нумарах «Маладосці» будуць апублікаваныя тэксты з запісных кніжак Уладзіміра Караткевіча пад агульнай назвай «АДПРАЦАВАЦЬ І АДВАЯВАЦЬ СВАЁ». Запісныя кніжкі захоўваюцца ў аддзеле рэдкіх кніг і рукапісаў Цэнтральнай навуковай бібліятэкі імя Якуба Коласа Нацыянальнай акадэміі навук Беларусі. Усе запісы друкуюцца ўпершыню. Падрыхтоўка да друку ды каментарыі — Пятра Жаўняровіча.

Чытачам «Маладосці» будуць прадстаўлены тры тэкставыя блокі з запісных кніжак.

У № 10/2023 — запісы розных гадоў, часта без датавання. Менавіта сюды трапілі вершы Уладзіміра Караткевіча, якія не ўвайшлі ў першыя два тамы Збору твораў.

У № 11/2023 — дзённікавыя запісы, зробленыя ў чэрвені 1970 года падчас турыстычнай паездкі па Чорным моры на цеплаходзе «Победа» (Адэса — Севастопаль — Ялта — Сочы — Сухумі — Новарасійск — Ялта — Адэса).

У № 12/2023 — дзённікавыя запісы, зробленыя ў ліпені 1971 года падчас паездкі ў Бешанковіцкі, Чашніцкі і Лепельскі раёны Віцебскай вобласці з экспедыцыяй «Збору помнікаў гісторыі і культуры Беларусі».

Запісныя кніжкі, з аднаго боку, дакумент эпохі з канкрэтнымі фактамі (падзеі, прозвішчы, пасады, найменні розных аб’ектаў і г.  д.), а з другога — набліжаныя да мемуарнай прозы самастойныя творы Уладзіміра Караткевіча. Пішучы нібыта для сябе, творца ўяўляе далейшы лёс «свайго дзіцяці», разумее, што падобныя запісы ўсё адно знаходзяць шлях да чытача, і стараецца быць шчырым ва ўсім.