Сярод празаікаў лютаўскага нумара – Арына Пранікава, Фёдар Гурыновіч і Таццяна Дземідовіч. Паэты нумара – Іван Карэнда, Марына Варабей, Алесь Стружко. Упершыню ў «Маладосці» свае творы прадставіць паэт Томаш Крывічанін.

У год стагоддзя з дня нараджэння Івана Навуменкі мы пагаварылі з яго сынам — Паўлам Іванавічам — літаратуразнаўцам і кандыдатам філалагічных навук. Размаўлялі пра бацьку-пісьменніка, бацьку-настаўніка і бацьку-аўтарытэта. А даследчык і літаратуразнаўца Мікола Трус у артыкуле «На прамяністым прадвесні…» прадставіў невядомыя вершы Івана Навуменкі. Абсалютна нязвыклая і нечаканая іпастась юбіляра як паэта фактаграфічна падсвечваецца невядомымі рукапісамі з фондаў Цэнтральнай навуковай бібліятэкі імя Якуба Коласа Нацыянальнай акадэміі навук Беларусі.

У рубрыцы «Мастацтва» Эмануіл Іофе і Людміла Рублеўская ўспомнілі самых выбітных артыстаў Купалаўскай сцэны.